សម្តេចតេជោ ហ៊ុន សែន ផ្តាំទៅព្រះអង្គម្ចាស់ ស៊ីសុវត្ថិ ធម្មិកោ ឲ្យចេះកិច្ចការងាររដ្ឋបាលច្រើនជាងនេះ បើល្ងង់មិនចេះគួរទៅរៀនពីកម្មករសំណង់
04-June-2016 | ដោយ មែន កំសត់
ភ្នំពេញ៖ មន្ត្រីជាន់ខ្ពស់កំពូលផុតលេខរបស់កម្ពុជា សម្តេចតេជោ ហ៊ុន សែន បានមានប្រសាសន៍ផ្តាំផ្ញើទៅព្រះអង្គម្ចាស់ ស៊ីសុវត្ថិ ធម្មិកោ ឲ្យចេះធ្វើកិច្ចការងារ រដ្ឋបាលច្រើនជាងនេះផង កុំប្រើគោរម្យងារជាព្រះអង្គម្ចាស់ធ្វើជាអ្នកចេះ ហើយបើល្ងង់មិនចេះ សូមទៅសួរកម្មករសំណង់ ឬរៀនសូត្រពីកម្មករសំណង់ ព្រោះកម្មករសំណង់ចេះច្រើនណាស់នាសម័យនេះ ហើយចេះច្រើនជាងព្រះអង្គម្ចាស់ទៅទៀត។
ការបញ្ចេញប្រតិកម្មខ្លាំងៗរបស់មន្ត្រីជាន់ខ្ពស់កំពូលផុតលេខរបស់កម្ពុជា បានធ្វើឡើងបន្ទាប់ពីព្រះអង្គម្ចាស់ ស៊ីសុវត្ថិ ធម្មិកោ តំណាងរាស្ត្រ គណបក្សសង្គ្រោះជាតិ បានផ្តល់កិច្ចសម្ភាសន៍ជាមួយវិទ្យុអាស៊ីសេរីថា «មកដល់ពេលនេះ ទីស្តីការគណៈរដ្ឋមន្ត្រីអត់ទាន់បានបង្ហោះនូវព្រះរាជសាររបស់ ព្រះករុណា នរោត្តម សីហមុនី ជូនសម្តេចតេជោ ហ៊ុន សែន ទេ។ បើសិនជាមានមែនគួរណាតែគណៈរដ្ឋមន្ត្រីផ្សព្វផ្សាយ»។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ដោយផ្ទាល់ពីប្រទេសម៉ាឡេស៊ី ផ្ញើទៅកាន់ព្រះអង្គម្ចាស់ ស៊ីសុវត្ថិ ធម្មិកោ ថា «រាល់ការចេញលិខិតទាំងឡាយរបស់ទីស្តីគណៈរដ្ឋមន្ត្រី បើពុំមានបញ្ជា និងចំណារពីនាយករដ្ឋមន្ត្រី លើព្រះរាជសាររបស់ព្រះមហាក្សត្រទេនោះ គឺមិនអាចចេញជាដាច់ខាត។ សូមផ្តាំទៅព្រះអង្គម្ចាស់ ស៊ីសុវត្ថិ ធម្មិកោ គួរឲ្យទៅរៀនពីកម្មករសំណង់លើកិច្ចការរដ្ឋបាល បើល្ងង់មិនចេះនោះ»។
សម្តេចតេជោ ហ៊ុន សែន បានបញ្ជាក់ថា «ខាងក្រោមនេះជាភស្តុតាង ចំណាររបស់ខ្ញុំនៅលើព្រះរាជសាររបស់ព្រះមហាក្សត្រ សូមមើលឲ្យច្បាស់»៕
ចំនួនអ្នកទស្សនា
- ថ្ងៃនេះ1961
- ម្សិលមិញ3511
- សប្តាហ៍នេះ14611
- ខែនេះ240281
- ឆ្នាំនេះ240281
- សរុប20682737